ROXAS CITY – Gin-designar ang Roxas Memorial Provincial Hospital (RMPH) bilang coronavirus disease (COVID-19) referral facility sang probinsiya sang Capiz.
Ini ang ginpahayag ni Provincial Health Office Dr. Leah Del Rosario sa ginpatigayon nga press conference sang gobyerno-probinsiyal.
Suno kay Del Rosario, importante nga ma-contain sa isa lamang ka lugar ang mga Persons Under Investigation (PUI’s) sa Capiz.
Ini agud malikawan nga may malatnan pa sang amo nga virus sa probinsiya.
Ginpahayag pa sang opisyal nga kun may isa lamang ka ospital nga gindesignar para mangin COVID-19 referral facility, indi na mabudlayan pa sa pag-distribute sang mga resources para sa pagtatap sa mga PUI’s.
Ginpasiguro man sang opisyal nga PUI pa lamang ang lalaki nga nag-positibo sa COVID-19, nagpatigayon na sila sang contact-tracing sa mga nakasalamuha sini.
Ginlab-ot naman sang mga health authorities ang mga trabaho, pamilya kag iban pa nga frontliners kag medical staffs nga nagtatap sa amo nga pasyente kag padayon nga gina-monitor.
