ROXAS CITY – Gindesignar ni Governor Esteban Evan Contreras II ang Roxas Memorial Provincial Hospital bilang pasilidad nga magatatap sa mga persons under investigation (PUIs) bangud sa coronavirus disease 2019 (COVID-19) sa probinsiya.
Bangud sini, wala na nagabaton ang RMPH sang mga pasyente nga wala sang kaangtanan sa COVID-19 sumugod sang nagligad nga semana.
Sa interview sang Bombo Radyo, ginpahayag ni RMPH Chief of Hospital Dr. Alex Nolasco nga gina-refer na nila sa mga district hospitals sa kabanwahanan ukon sa pribado nga ospital ang iban nga mga pasyente nga luyag magpabulong sa pasilidad.
Bangud sini suno kay Nolasco, magatutok na ang resources sang probinsiya sa RMPH sa pagpreparar sa posibilidad nga magsaka pa ang numero sang mga PUI sa Capiz.
Ginpasalig man sini nga may nagakaigo nga numero sang mga doktor kag iban pa nga hospital staff ang RMPH ilabi na nga may mga naggikan sa Out-Patient Department sa Barangay Lanot nga nagsaylo diri makaligad nga ginpaidalum anay sa rehabilitasyon ang nasambitan nga pasilidad.
Nagalab-ot sa kapin 150 ka mga PUIs ang sarang nga matatap sang RMPH bilang isa ka Level 3 hospital.
Sa karun may yara pa sang lima ka mga PUI sa probinsiya samtang ang isa ka nagpositibo nga kaso ang gindala na sa Western Visayas Medical Center sa Iloilo City.
Gina-refer sa Western Visayas Medical Center ang mga PUI nga nagapositibo sa COVID-19 bangud ini ang gindesignar sang Department of Health nga magbaton sang COVID-19 cases sa Western Visayas.
