ROXAS CITY – Ginpabutyag ni Dr. Florencio Luching, nagapanumbalik nga tagdumala sang Roxas Memorial Provincial Hospital (RMPH) nga nagpadala sila sang sulat sa Gobernador nga nagakinahanglan ang ospital sang kapin 40 ka mga nurses.
Sa interview sang Bomno Radyo, suno kay Dr. luching nga kinahanglan nila nga magdugang sang nurses bangud ang iban diri ang nagahulat nalang nga magabiya padulong sa abroad.
Bangud sini, pagakulangon sila sang nurses, ilabi na kun may maga-leave sa trabaho, gani sa karon nagatrabaho sang 12-oras ang mga ini, agud may bastante nga tawo sa nurses station.
Nahibaluan nga suno kay Luching may yara sang 623 ka mga empleyado ang RMPH, kun sa diin kapin 440 diri ang casual employees.
Sa karon, wala sang paghulag sa mga suweldo, apang may posibilidad nga may increase sa bug-os nga pampubliko nga ospital sa probinsya sa sini nga administrasyon.
Sa pihak nga bahin, posible man suno diri nga mabaton na subong nga bulan ang suweldo sang mga nurses sa bulan sang Nobyembre kag Disyembre sang nagligad nga tuig.
