ROXAS CITY – Nagdepensa ang pamunuan sang Roxas Memorial Provincial Hospital (RMPH) sa ila panindugan nga gilayon nga i-cremate ang napatay nga COVID-19 suspect sa amo nga ospital.
Suno kay Dr. Alex Nolasco, Chief of Hospital kag Hospital Management Section (HMS) head, ang gilayon nga pag-cremate sa isa ka COVID-19 suspect ang sandig mismo sa guidelines sang Department of Health (DOH).
Suno diri nga ang mga suspected patients ang ginakabig nga ‘highly infectious’ gani ginapanugyan gid ang ‘immediate burial’ ukon gilayon nga pagpalubong ukon cremation.
Indi na suno diri mahulat pa sang ospital ang resulta sang real-time polymerase chain reaction (RT-PCR) test sang isa ka napatay nga suspect patient antes desisyunan kun i-cremate ini ukon indi.
Nagaguwa suno diri sa findings sang ospital nga posible gin-atake sa korason ang amo nga pasyente apang ginaangut man ini sa COVID-19 bangud nagpositibo siya sa rapid test.
Nagpanindugan man si Nolasco nga wala sang nangin kapabayaan ang ospital sa pagtatap sa nasambit nga pasyente kag nagsunod lamang sila sa nagakaigo nga proseso.
