ROXAS CITY – Nagtukod na sang dengue ward kag dengue fastlane ang pamunuan sang Roxas Memorial Provincial Hospital bangud sa padayon nga pagtimbuok sang dengue cases sa siyudad sang Roxas kag probinsiya sang Capiz.
Ini ang ginpahayag ni Joan Cruz-am, ang Administrative Officer IV sang Quality Management and Customer Relation Office sang nasambit nga ospital sang mainterview sang Bombo Radyo Roxas.
Ginpahayag sini nga bangud sa padayon nga pagtimbuok sang kaso sang nasambit nga balatian, nagtukod na ang pamunuan sang ospital sang dengue ward kag dengue fastlane nga gilayon magaakomodar sa mga pasyente nga positibo sa dengue.
Humalin suno sa iya sang bulan sang Enero sini nga tuig tubtob subong, naglab-ot na sa 394 ang ila naakomodar nga mga dengue patients kun sa diin ang 73 sa mga ini ang nagapabilin pa nga confined sa ospital.
Aminado si Cruz-am nga kulang ang bed capacity sang nasambit nga ospital rason nga ginahimuan na lamang nila ini sang pamaagi bangud indi man nila mahimo mabalibaran ang mga pasyente.
Magluwas sa dengue ward, may mga dengue patients pa suno sa iya gikan sa mae ward, female ward, pedia ward kag veteran ward.
Nagtimbuok suno sa iya ang kaso sang nasambit nga balatian sadtong nakaligad nga bulan sang Hunyo kun sa diin naglab-ot sa 172 ka mga pasyente ang ila na-confine sa nasambit nga ospital.
