ROXAS CITY – Ginpakigbahin ni Dr. Florencio Luching ang luyag ni Governor Fredenil ‘Oto’ Castro nga mangin pamatasan sang mga staff kag empleyado sang Roxas Memorial Provincial Hospital sa ila mga pasyente kag kliyente.
Sa interview sang Bombo Radyo sa officer-in-charge sang RMP, ginpahayag sini nga ginpalab-ot na sini sa mga katapo sang nasambit nga pampubliko nga ospital nga magpakita sang maayo nga pamatasan sa ila nga trabaho.
Ginpaintindi man ni Dr. Luching nga dapat mangin manaya-naya ang nawong sang mga RMPH personnel sa mga pasyente kag bantay bangud mga ‘stress’ ang mga ini sa pagtenir sa ospital, pagpangita sang kuwarta kag iban pa nga palanumdumon, rason nga kun indi maayo ang pagtrato sang mga taga-RMPH sa ila kliyente, dira nagasugod ang indi pag-intindihanay.
Ginapangabay man sang tagdumalahan sang ospital sa mga pasyente kag mga bantay nga intindihon man kun kaisa ang sitwasyon sang mga nurses ukon staff nga kapoy bangud sa ila stressful nga trabaho.
