ROXAS CITY – Plano sa karon sang tagdumalahan sang Roxas Memorial Provincial Hospital (RMPH) nga maka-admit sila sang kapin 200 ka mga pasyente kada adlaw.
Ini ang ginpahayag ni Dr. Florencio Luching, OIC sang nasambit nga ospital, sang mainterview sang Bombo Radyo.
Suno diri, sa karon may yara lamang sang 150 tubtob 160 ang masarangan nga ma-admit sang RMPH kada adlaw, apisar nga ang bed capacity ang yara lamang sa 147.
Dugang pa sini, sang wala pa sang COVID-19, masarangan sang ospital nga magbaton sang tubtob 300 ka pasyente kada adlaw, bangud kun kinahanglan, ginapahamtang nalang ang mga ini sa benches, ilabi sa mga kabataan, apang sa karon, indi na ini mahimo bangud sa social distancing.
Sa pihak nga bahin, ginkumpirmar man ni Dr. Luching nga untat na ang operasyon sang Malasakit Center bangud ini nga programa ang ginpondohan sadto anay ni former President Rodrigo Duterte, kag nakadepende sa akron kun liwat ini nga pagabuhion ni Presidente Bongbong Marcos, Jr.
Apang, may yara sa gihapon sang iban pa nga pamaagi nga mabuligan sang gobyerno ang mga indigent nga pasyente sa ila hospital bill.
