ROXAS CITY-Ginkompimar sang Assistant Department Head sang Roxas City Government nga liwat nga magapatuman sang Road Clearing Operation ang lokal nga gobyerno sang siyudad subong nga bulan sang Enero.
Sa interview sang Bombo Radyo sa kay Mr. Ronald Amigo, Assisant Department Head sang Roxas City Government, ginkompirmar sini nga ginsapol na ni Roxas City Mayor Ronnie Dadivas ang Task Force para sa pagpasangkad sang road clearing operation sa siyudad.
Suno kay Amigo nga magapatigayon sang inspeksyon ang task force sa siyudad agud hatagan sang notisiya ang mga indibidwal nga may yara sang mga ilegal nga istruktura nga nagsablag sa karsada antes ipatuman ang amo nga layi.
Kalakip sa mga hatagans ang warning amo ang mga sidewalk vendors kag mga salakyan nga nagpatigayon sang illegal parking sa mga karsadahon.
Aminado si Amigo nga isa sa mga problema sang siyudad amo ang madata nga pagpark sang mga salakyan sa kilid sang karsada.
Samtang nagpanugyan naman si Amigo sa mga may yara sang mga ilegal nga struktura sa mga karsadahon nga amat-amaton nga kakason ini antes pa man ipatuman ang dalayon nga implementasyon sa Enero 18, sini nga tuig.
Nagpaandam naman ini nga may yara sang nagakaigo nga penalidad sa mga indibidwal nga indi magsunod sa nasambit nga layi.
Mahibaluan nga ang nasambit nga tikang sang gobyerno sang siyudad amo pagsunod sang ginpapanaog nga memorandum circular sang Department of the Interior and Local Government (DILG).
