ROXAS CITY – Ginbalik na ang operasyon sa pagpatigayon sang road construction ukon pagpakaayo sang dalan sa San Roque Street, Roxas City.
Ini ang ginpahayag ni Engr. Julius Abela, hepe sang Maintenance and Construction Division sang Department of Public Works and Highways (DPWH) Capiz 1st Engineering District sang mainterview sang Bombo Radyo.
Suno kay Abela nga na-comply na nila ang tanan nga mga requirements sang city government rason nga nagsugod na ang konstruksiyon sang dalanon sadtong Setyembre 15.
Nagalab-ot naman sa P16M ang budget para sa reconstruction and rehabilitation sang nasambit nga dalanon lakip na diri ang pagpakaayo sang mga drainage system.
Target naman ini nga matapos sa Disyembre 31, 2020.
Bangud sa pagpakaayo sang nasambit nga dalanon may yara man sang ginpahamtang nga mga alternate route nga sarang maagyan sang mga pumuluyo.
Mahibaluan nga ang G-Arabia Platinum Construction and Development Company ang construction company nga nagapakaayo sa nasambit nga dalanon.
Samtang, padayon man ang pagpakaayo sang mga dalanon kag road widening sa pila ka mga lugar sa siyudad partikular na sa Barangay Cagay padulong sa Balijuagan sining siyudad.
Magluwas diri, iga-construct man ang dalanon sa Roxas City Airport gikan sa San Roque Street padulong sa Arnaldo Boulevard, Barangay Baybay, Roxas City.
