ROXAS CITY – Nagpalab-ot sang reklamo sa Bombo Radyo ang 29-anyos nga Returning Overseas Filipino (ROF) nga naka-quarantine sa karon sa Municipal Quarantine Facility sa banwa sang Jamindan matapos nga ginaalegar ginpasudlan sang Locally Stranded Individual (LSI) ang nasambit nga quarantine facility.
Suno sa wala na ginhingadlan nga ROF nga ginareklamo sini ang pagpahamtang sang isa ka LSI sa iya sini ginadayunan nga isolation room bangud suno diri duha na lamang ka adlaw antes magatakup ang iya quarantine period kag ginahulat nalang ang resulta sang iya RT-PCR Test rason nga gin-kwestiyon niya ini.
Ginpahayag pa sini nga Agosto 29 sang nag-abot ini sa probinsya gikan sa Metro Manila kag Setyembre 2 sang ini ang ginpaidalum sa swab testing.
Dugang pa sini nga wala man ini sang may ginlapas nga pagsulundan kag nagsunod man ini sa mga nagakaigo nga protocols agud mapabilin nga hilway sa COVID-19.
Ginkalain man sang iya balatyagon bangud ginpatawgan kag ginpakadtuan pa ini sang mga kapulisan apisar nga wala man ini nagtuga sang gamo.
