Nagpasugot na si Philippine Olympic Committee (POC) president kag Tagaytay Mayor Abraham Tolentino sa hosting sang Philippine Reserve Officer Training Corps Games para sa Luzon, NCR Leg kag National Championships.
Ang nasambit nga sporting event base sa kolaborasyon sang Armed Forces of the Philippines (AFP) Reserved Command.
Para sa Luzon kag NCR Leg, nakatalana ini humalin Hulyo 28 tubtob Agosto 3, 2024. Samtang, ang National Championship stage ang humalin Agosto 18 tubtob Agosto 24, 2024.
Nagpirma naman sang memorandum of agreement si Mayor Tolentino kaupod sanday Maj. Gen. Romulo Manuel, commander sang Philippine Navy Reserve Command kag Brig. Gen. Vicente Ronatay Jr, commander sang AFP Reserved Command for the ROTC Games 2024.
Ang nasambit nga sporting event ang ginalauman nga pagatambungan sang masobra ka 1,000 student-athletes nga magapaindis-indis sa gakalain-lain nga mga event.
Ang tinutuyo sang ROTC games nga mai-angat ang pagsuporta sang mga kabataan sa ROTC pinaagi sa friendly sports competition, makadiskobre sang mga bag-o nga player, kag mapataas ang sportsmanship sa mga kabataan.
