ROXAS CITY – Wala ginalauman sang isa sa mga administrator sang Roxas City Barter Community nga suportahan sang mga netizens ang ila nga page nga nagaserbe alagyan agud ma-barter sang isa ka indibidwal ang mga kagamitan nga wala na sini ginagamit.
Ginpahayag ni Angelo Blancaver nga malipayon sila sang kaupdanan nga mga administrators kag excited nga madamo ang nangin interesado nga magpa-miyembro sa ila nga page.
Suno kay Blancaver katuyuan sini nga page nga mangin mapuslanon pa sa iban ang pila ka mga kagamitan nga wala na ginagamit sa ila nga balay, apang magamit pa sang iban.
Apang may pila sila ka mga pagsulundan nga dapat sundon sang mga naga-barter sang ila mga kagamitan.
Ginpahanumdum man ni Blancaver sa mga netizen nga cashless transaction lamang ang ila ginapahanugutan diri.
Mahimo magbarter sang anuman nga kagamitan apang wala sang cash nga involved.
Hugot man nga ginadumilian ang pagbarter sang mga kasapatan.
Nagpahanumdum man si Blancaver nga bawal ang private message sa mga naga-barter bangud kinahanglan nga mangin transparent ang transaction sang magtimbang nga bahin.
