ROXAS CITY – Malipayon nga ginpahibalo ni Capiz 1st district Congressman Emmanuel ‘Tawi’ Billones Sr. nga liwat na nga magapadayon kag matapos ang Roxas City Circumferential Road.
Ini ang ginpahayag sang kongresista sang mainterview sang Bombo Radyo.
Suno kay Billones nga nagalawig sang 9.1 kilometers ang nasambit nga karsada gikan sa Barangay Culasi lapos sa Barangay Balijuagan, sining siyudad.
Mahibaluan nga sadtong tuig 2013 ginsuguran ang amo nga proyekto nga ginpondohan sang kapin 300 tubtob 400 milyones pesos.
Matandaan nga ini ang nauntat bangud sa nangin isyu sang pagpamalabag sang pamilya Tan nga ini ang mapadayon bangud wala sila nagpasugot sa gintan-ay sang gobyerno para sa ila maapektuhan nga propeidad.
Apang suno kay Billones matapos nga ginpalab-ot sa korte ang amo nga isyu agud maresolbar, ginpaboran diri ang gobyerno rason nga mahimo na ini nga mapadayon.
Suno pa sa kongresista naghatag na ini sang kapin sa 101 milyones pesos nga pondo agud nga matapos ang tulay kag makalapos ang karsada sa Barangay Sibaguan, sining siyudad.
Nagasalig naman si Billones sa Department of Public Works and Highways (DPWH) Region 6 nga amo ang naga-implementar sang proyekto nga matigayon na ini nga matapos sini nga tuig 2020.
Mahibaluan nga kapin sa 374 metros na gid lamang nga kalawigon sang karsada ang wala matapos sa amo nga proyekto.
