ROXAS CITY – Gin-aprubahan na sang Sangguniang Panlungsod ang request sang gobyerno sang siyudad nga pagdihon sang Special Account para sa pondo sang siyudad gikan Bayanihan Grant to Cities and Municipalities para sa tuig 2020.
Ini ang ginkompirmar mismo ni Roxas City Mayor Ronnie Dadivas nga sang mainterview sang Bombo Radyo.
Ginpahayag ni Dadivas nga kinahanglan nga mapaagi ang nasambit nga pondo sa special account bangud indi ini mapasulod sa General Fund sang siyudad bangud gikan ang nasambit nga pondo sa gobyerno-nasyunal.
Suno kay Dadivas nga ang nasambit nga pondo ang nagabalor sang kapin sa P54.1 milyones nga pagagamiton para sa coronavirus disease (COVID-19) programs, projects, activities and expenses sandig sa Local Budget Circular No. 125 sang Department of Budget and Management (DBM).
Suno sa alkalde nga sa nasambit nga pondo, ginpainan sini sang kapin P29.3 milyones ang para sa food assistance kag iban pa nga relief goods para sa mga pumuluyo nga apektado sang ginapatuman nga Enhanced Community Quarantine.
Pagapainan man sang pondo ang pagbakal sang Personal Protective Equipments (PPE’s), rapid test kits, bulong, vitamins, food and transportation fuel para sa medical personnel and frontliners, temporaryo shelters kag iban pa nga COVID-19 related expenses.
