ROXAS CITY – Nagpasalig ang chairman sang Ethics Committee sa Sangguniang Panlungsod nga ila tinguhaan nga mapapasar sa masunod nga regular session ang resolution nga nagapalayag sang ila sentimyento angut sa bawal angkas policy sa motorsiklo sang Land Transportation Office (LTO).
Ginpahayag ni City Councilor Midelo Ocampo nga luyag nila nga ma-defer ukon mapaiway ang memorandum sang LTO nga nagadumili sa pag-angkas sa mga motorsiklo.
Suno sa opisyal nga tama man kuntani ini agud mapatuman ang physical distancing protocol, apang indi praktikal nga plano sang ahensiya bangud madamo ang maapektuhan labi na nga limitado lamang ang nagabiyahe nga mga tricycle sa syudad bangud sa ginapatuman nga number coding scheme.
Suportado man sang konseho sang syudad suno kay Ocampo ang ginahinyo sang mga pumuluyo sa LTO nga pahanugutan nga maka-angkas ang immediate family members agud indi sila ma-delayed sa ila pagakadtuan.
Pananglitan nga indi pagpamatian sang LTO ang panawagan sang mayorya angut sa bawal angkas policy, may isa ka opsyon nga pagahimoon ang Sangguniang Panlungsod.
