ROXAS CITY – Nagpapasar sang isa ka resolusyon ang konseho sang siyudad sang Roxas nga naga-defer ukon nagapaiway sang implementasyon sang Memorandum Circular 036-2020 sang Department of Interior and Local Government (DILG) ukon pagdumili sang mga tricycle sa national highways.
Ini ang ginpahayag ni City Councilor Albert Gregory Potato, chairman sang Committee on Public Transportation and Utilities sang Sangguniang Panlungsod sang mainterview sang Bombo Radyo.
Suno kay Potato nga katuyuan sang amo nga resolusyon amo ang mapabakod pa ang igadihon nga request ni City Mayor Ronnie Dadivas sa DILG natuhoy sa pagkonsiderar sa siyudad sang Roxas nga indi pag-ilakip sa implementasyon sang nasambit nga laye.
Matandaan nga una naman nga nagtukod ang alkalde sang siyudad sang Roxas City Tricycle Task Force kag Technical Working Group nga magabalay sang Tricycle Route Plan sa sulod sang 30 diyas.
Mahibaluan nga 30 diyas ang ginhinyo sang gobyerno sang siyudad sa Highway Patrol Group (HPG) nga indi anay magpangdakop sa mga tricycle sa national highways samtang ginahitsu pa ang mangin solusyon sa amo nga isyu.
Apang suno kay City Councilor Potato, nagaapelar gid sila nga indi malakip ang siyudad sang Roxas sa implementasyon sang nasambit nga laye.
