ROXAS CITY – Ginpapasar sa sesyon sang Sangguniang Panlungsod sang Roxas City ang resolusyon nga nagaganyat sa mga coronavirus disease (COVID-19) survivor nga mag-donate sang ila nga blood plasma nga pagagamiton para sa Convalescent Plasma Therapy.
Ini ang ginpahayag ni City Councilor Cesar Yap Jr., chairman sang Committee on Health, Nutrition and Sanitation sang konseho kag author sang nasambit nga resolusyon sang mainterview sang Bombo Radyo Roxas.
Suno kay Yap, katuyuan sini nga mabuligan ang mga critically-ill COVID-19 patients nga makarekober sa nasambit nga balatian.
Ang nasambit nga therapy ang isa ka proseso kun sa diin ginatughong ang blood plasma sang isa ka COVID-19 survivor sa isa ka COVID-19 patient mapabaskog ang immune system sini kag mabatuan ang virus sa iya nga lawas.
Suno diri ang isa ka COVID-19 survivor ang may yara na sang anti-bodies batuk sa nasambit nga virus.
Kasunod sini, nagalaom ang nasambit nga opisyal nga maganyat ang mga COVID-19 survivor kag magsabat sa panawagan nga mabuligan ang iban pa nga pasyente nga padayon nga nagapakigbato sa amo nga balatian.
