Nagpatigayon liwat sang session ang Sangguniang Panlungsod sang Roxas City may kaangtanan sa padayon nga problema sa suplay sang tubig.
Suno kay Hon. Rey Magallanes, kinahanglan nga mapahamtang ang maathag nga impormasyon kag masabat ang mga pamangkot sang publiko may kaangtanan sa nagapadayon nga water interruption sa nagkalain-lain nga barangay sa syudad.
Madamo sang residente ang nagapalab-ot sang reklamo bangud sa kakulang sang supply sang tubig nga nagakaapekto sa ila adlaw-adlaw nga pagpangabuhi kag iban pa nga panginahanglanon sa panimalay.
Pahayag pa niya nga importante nga may detalyado kag regular nga advisory ang MRWD ilabi na kun may naka-schedule nga interruption, agud makapanghanda ang mga residente kag malikawan ang kalain sang sitwasyon sa mga apektado nga lugar.
Nahibaluan nga nagtambong man sa session ang katapo sang Metro Roxas Water District agud maghatag sang sabat sa mga concern sang mga pumuluyo sang Roxas City.
