ROXAS CITY – Luyag sa karon sang konseho sang siyudad nga matutukan ang Panay River ilabi na ang porsyon nga sakop sang siyudad sang Roxas.
Kasunod ini sang ginpahayag ni City Councilor Moreno Gonzaga, ang chairman sang Committee on Aquaculture sang Sangguniang Panlungsod sa iya nga privilege-speech sa regular session sang konseho.
Sa iya nga diskurso-pribilehiyo, ginpakigbahin ni Gonzaga ang mga nanotaran sini sa iya nga paglibot sa mga kasubaan nga sakop sang siyudad.
Ginpahayag sini nga sadtong Disyembre 8 sang naglibot ini sa kasubaan kag iya nakit-an ang pila ka porsyon nga tuman ka higko kag madamo sang basura.
Magluwas diri, natalupangdan man ang pila ka mga illegal structures nga nahamtang sa kasubaan nga sakop sang siyudad.
May yara man sang mga kabalayan nga direkta nga nagabulhog ang ila nga kasilyas kag lababo sa suba.
Bangud sa nasambit nga mga problema, luyag sang konsehal nga tutukan ini sang konseho sang siyudad.
Natalana nga magpatawag sang isa ka sinapol si Gonzaga agud mahinalaan ang solusyon nga ila mahimo natuhoy sa nasambit nga problema.
