ROXAS CITY – Nagaapelar si Roxas City Councilor Midelo Ocampo sa mga Barangay Officials nga magakig-angot anay sa Department of Social Welfare and Development ukon sa local government antes magpaguwa sang impormasyon, guidelines ukon mensahe sa mga pumuluyo nahanungod sa emergency cash transfers ukon ayuda.
Sa interview sang Bombo Radyo kay Councilor Ocampo, iya ginpahayag nga wala na sang bagyo nga tatlo man ka beses nga nagsulod kag nag-igo sa Capiz apang ang ginbilin sini nga problema sa komunidad ang tuman man kadako bangud pati ang relasyon sang pumuluyo kag barangay ang apektado bangud sa issue sang cash assistance.
Suno sa konsehal, ginabasol sang mga pumuluyo subong ang mga barangay officials bangud may yara sang iban nga nagapaguwa sang guidelines apisar indi man otorisado kag nagahatag ini sang komplikasyon sa paghangop sang mga tawo.
Dugang pa sang natungdan, mas mayo nga idangop sang mga pumuluyo kag sang mga barangay officials ang ila concern sa nasambit nga ahensya agud maathagan nahanungod sa ayuda.
