ROXAS CITY – Luyag sang Roxas City Disaster Victims Association sa Angelville Subdivision sa Barangay San Jose nga mapasakaan sang nagakaigo nga reklamo ang mga opisyales sang ila nga barangay.
Suno sa presidente sang nasambit nga asosasyon nga si Mr. Roderick Dela Cruz, nagpadala na sila sang sulat kay City Mayor Ronnie Dadivas kun sa diin nasaad ang ila nga reklamo batuk sa nasambit nga mga opisyales.
Ang ginareklamo nga mga opisyales amo sanday Punong Barangay Albert Calipayan kag mga barangay kagawad sini nga sanday Joselito Cordovero, Richard Blancaflor, Maricris Calipayan, Joselyn Dela Peña kag barangay treasurer nga si Jose Dela Cruz.
Kalakip sa ginareklamo sang asosasyon amo ang pagpatigayon sang inspeksiyon sang nasambit nga mga indibidwal sa housing units sang mga miyembro sang grupo sa Angelville.
Suno diri nga ginausisa sila kag ginapangitaan sang mga papeles butang nga ila ginkatingala bangud posible nga wala sang mandu nga magatsekyar ang nasambitan nga mga opisyal sa ila.
May mga alegasyon pa suno diri nga ginapasibangdan sila nga ginabaligya ukon ginaparentahan ang pila ka housing units sa lugar.
Dugang pa diri ang ginaalegar pagpamahog sa ila sang nasambit nga mga opisyales nga nagresulta sa ila pagkahangawa sa ila seguridad.
Kalakip sa ipasaka nga reklamo sang grupo sa nasambit nga mga opisyales amo ang Grave Abuse of Authority, Grave Misconduct kag Usurpation of Authority.
