Naka-code blue alert status na ang Roxas City Disasters Risk Reduction and Management office sa pag-obserbar sang Semana Santa.
Sa interview sang Bombo Radyo kay Gilbert Francisco Fernando, Head sang Roxas City Disasters Risk Reduction and Management office, iya ginpahayag nga magadeploy sila sang kapin 150 ka mga personnel sa nagkalain-lain nga ahensya agud masiguro ang seguridad sang mga tawo nga magatambong sa semana santa.
Suno kay Fernando, magapahamtang man sila sang help desk sa pila ka mga simbahan sa syudad sang Roxas, kaangay sang Mt. Carmel Parish Church, Metro Politan Cathedral, Santa. Teresa De Avila Parish Church, St. Vincent Ferrer Parish, kag mga Mission station sa bulig sang Barangay Risk Reduction and Management Committee (BRRMC).
Pahayag pa niya, nga ang ila emergency operation center ang bukas man 24/7 sa pagresponde kag pagbaton kon may magluntad nga pila ka mga emerhensya.
Samtang, ginahinyo man sini sa mga pumuluyo nga magkooperar kag magsunod sa mga otoridad para sa malinong nga pag-obserbar sang Semana Santa.
