ROXAS CITY- Driver kag backrider sang motorsiklo, patay matapos bumunggo sa nakaparada nga 10-wheeler cargo truck sa Arnaldo Boulevard, Roxas CityGinbawain sang hulam nga kabuhi ang 2 ka biktima sa nagluntad nga aksidente sa Arnaldo Boulevard, Barangay Baybay, Roxas City pasado alas 5:30 sang aga subong nga adlaw.
Sa nakuha nga impormasyon sang Bombo Radyo, ginapahayag nga ang driver sang nasambit nga motorsiklo ang ginkilala kay alyas “Jeff” kag ang back rider sini nga si alyas “JM” nga lunsay mga residente sang syudad sang Roxas.
Base sa ginpahayag sang mga nakakita sa insidente nga samtang ginasubay sang nasambit nga mga biktima ang dalanon pasulod sa syudad sang Roxas nagikan sa may bahin sang Barangay Baybay, Roxas City, hinali ini nga bumunggo sa nakapark nga truck sa lugar.
Mahibaluan nga wala sang suksok nga helmet ang mga ini rason nga nag-angkon sang patal nga pilas sa ila nga ulo.
Gina-alegar nga yara sa impluwensiya sang makahulubog nga ilimnon ang mga biktima.
Madasig naman nga ginrespondihan sang mga katapo sang Roxas City Emergency Response Team kag gindapatan sang pauna nga pagbulong antes paman ini nga gindala sa pinakamalapit nga ospital, apang gindeklarar ini nga dead on arrival sang doctor.
Sa karon yara na sa kustudiya sang Roxas City Police Station ang driver sang truck kalakip na ang imbolbado nga salakyan sa nasambit nga insidente.
