Ginaduso sang Roxas City Government ang pagpauswag kag pagmodernize sang Culasi Port agud mapauswag ang serbisyo kag aktibidad sa pantalan.
Sa interview sang Bombo Radyo kay Melvin Galagate, Head sang Roxas City Communications Group, iya ginpahayag nga nagpadala sang sulat ang syudad sa Department of Transportation (DOTr) para sa nagakaigo nga pondo sa pagpakaayo kag modernization sang Culasi Port.
Suno kay Galagate, ginatuyo sang proyekto nga mapauswag ang serbisyo sa Cargo Operations, Passenger Services, Fishery Logistics kag inter-island transport connectivity.
Dugang pa sang natungdan, ang inisyatibo ni Roxas City Mayor Ronnie Dadivas nagatuyo nga mapauswag ang kahimtangan sang pantalan, makabulig sa pag-uswag sang lokal nga ekonomiya kag maghatag sang dugang nga oportunidad sa mga pumuluyo.
