ROXAS CITY – Ginsiguro sang Roxas City Government nga indi maapektuhan ang ila pagserbisyo sa publiko apisar sang pagpatuman sang 4-day Work Week.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga ang pagpatuman sang 4-day Work Week ang sandig sa Memorandum Circular No.114 halin sa Office of the President kun sa diin ang oras sang opisina magaumpisa Lunes tubtob Huwebes, las 8:00 sang aga tubtob las 7:00 sang gab-i kag ang Biyernes amo ang isa ka adlaw nga wala sang trabaho.
Suno kay Galagate, para masigurado ang padayon nga pagserbisyo, magapabilin ang normal nga operasyon sang pila ka mga opisina kaangay sang City Disaster Reduction and Management Office, Roxas City Emergency Response Team, Roxas City Health Office, City Social Welfare and Development Office, Roxas Integrated Transport Terminal, Teodoro Arcenas Trade Center ,City Slaughterhouse, Libas Fishing Port, kag City Environment and Natural Resources Office.
Pahayag pa niya, ang Human Resource Department ang maga-tsekyar sa tagsa ka mga opisina kun magasunod sila sa scheme nga gintalana sang Roxas City Government in compliance sang nasambit nga memorandum.
Nagpasalig man ang natungdan sa publiko nga magapadayon ang maayo nga pagserbisyo sang Roxas City Government sa tanan nga mga nagakinahanglan sang bulig kag pag-ulikid.
