Handa nga atubangon sang Roxas City Government ang kaso nga ipasaka sang mga Del Rosario sa isyu sang Right of Way sa Sitio Pagutok, Barangay, Dayao Roxas City.
Sa interview sang Bombo Radyo kay Mr. Melvin Galagate, head sang Roxas City Communication Group, iya ginpahayag nga may yara sang ginahimo nga tikang ang Roxas City Goverment sa pagpanguna ni Atty. Mayor Ronnie Dadivas angut sa ipasaka nga kaso.
Suno kay Galagate, ginhimo lamang sang Alkalde ang tama bangud mabudlyan ang mga pumuluyo nga naga-istar sa amo nga Barangay, labi na sa tion sang emerhensya.
Gin-athag man ni Galagate, nga sa pagbaligya sang duta, kinahanglan may ginahatag nga right of way agud masiguro nga may agyan ang mga residente.
Nahibaluan nga ang nasambit nga duta ang ginapanag-iyan ni Mr. Dennis Del Rosario.
Sa pihak sini, ginpahayag ni Galagate nga naga hulat man lang sila sang plano sang tag-iya sang duta agud makig-negosasyon kag malikawan nga maglala pa ang nasambit nga problema.
