Magapanumbalik na sa regular nga lima ka adlaw nga duty schedule sang Roxas City Government nga maga-umpisa sa Mayo 18, 2026 para sa tanan nga empleyado sang syudad.
Sa interview sang Bombo Radyo kay Melvin Galagate, head sang Roxas City Communications Group, iya ginpahayag nga pinaagi sa Memorandum Circular No. 114, magabalik na sa normal nga lima ka adlaw kada semana ang trabaho matapos ang ginpatuman nga “Four-Day Duty Schedule.”
Suno kay Galagate, ang amo nga tikang ang kabahin man sang pagpadayon sang maayo nga public service para sa mga pumuluyo sang syudad.
Apisar sini, magapadayon sa gihapon ang mga “austerity measures” ukon tikang sa pagtipid sang enerhiya bilang kabahin sang energy conservation efforts sang local government.
Ginabisuhan man ang tanan nga concern nga empleyado kag mga departamento nga sundon kag ipatuman ang bag-o nga direktiba.
