Madamu pa sang sports event ang ginapaabot nga patigayon sa Roxas City subong nga tuig kasunod sang ginpatigayon nga basketball exhibition game sa tunga sang Gilas Legends kag Roxas City Flyers.
Sa interview sang Bombo Radyo kay Melvin Galagate, Head sang Roxas City Communications Group, iya ginpahayag nga ang nasambit nga exhibition game naghatag sang daku nga kalingawan kag nangin mapuslanon, rason nga mas madamo pa nga sports activities ang ginaplano para sa masunod nga mga bulan.
Suno kay Galagate, daku nga kabahin sang programa ang sports development sang Roxas City nga nagatuyo nga mapauswag ang talento kag abilidad sang mga lokal nga players.
Pahayag pa niya, libre ang basketball clinic ni Coach Mike Reyes para sa mga kabataan, nga nagatuyo nga mapalapad ang ila ihibalo kag skills sa basketball.
Nagpasalig man ang Roxas City Government nga padayon ang ila suporta sa mga programa nga nagapukaw sang potensyal sang kabataan kag naga-promote sang sports development sa syudad.
