Nagapreparar na ang Roxas City Government para sa pagpatigayon sang Licensure Examination for Teachers (LET) sa siyudad sang Roxas.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga nagadepende sa Professional Regulation Commission (PRC) ang kabug-usan nga preparasyon kag pagpatigayon sang LET.
Suno pa sa iya, ikaduha na ini nga tion nga nag-request ang Roxas City Government nga sa siyudad pagpatigayonon ang Teachers Licensure Examination.
Ginatan-aw ini sang administrasyon ni Mayor Ronnie Dadivas bilang isa ka paagi agud mabuligan ang mga manugkuha sang LET, ilabi na ang mga examinees halin sa Capiz kag sa mga kaiping nga probinsya.
Pahayag pa niya, ang Public Employment Service Office (PESO) sang Roxas City ang nagabaton sang mga interesado nga magkuha sang LET nga mga residente sang siyudad kag sakop sang local government unit, agud mahatagan sang assistance sang City Government.
Samtang, ang PRC ang may authority sa pagdeterminar kon ano nga mga eskwelahan ang pagagamiton bilang testing centers.
May yara man sang close coordination ang PRC kag Department of Education (DepEd) Roxas City Division sa pag-check sang mga posible nga testing venues.
Suno pa sa opisyal, ang Roxas City Government ang nagafacilitate sang mga kinahanglanon sang LET examinees, samtang ang PRC ang magadeterminar kon pila ka examinees ang pagahatagan sang slot para sa examination.
Sa karon, ginpaabot ni Galagate ang maayo nga resulta para sa tanan nga LET takers kag gin-agda sila nga himuon ang ila pinakamaayo agud malab-ot ang handom nga mangin licensed teacher kag makaserbisyo sa mga kabataan sa Roxas City, Capiz kag sa bilog nga Pilipinas.
