Ginlunsyar sang Roxas City Government ang Ordinance No. 031-2026 ukon Institutionalized Drug-Free Workplace Ordinance nga may tinutuyo nga masiguro nga mangin drug-free workplace ang lokal government unit sang Roxas City.
Sa interview sang Bombo Radyo kay Roxas City Mayor Ronnie Dadivas, iya ginpahayag nga kabahin ini sang padayon nga kampanya sang siyudad batok sa iligal nga droga. Sakop sang ordinansa ang mga regular employees, contractual kag job order workers, mga barangay kag SK officials, barangay tanod, barangay health workers, barangay social workers kag mga miyembro sang Lupong Tagapamayapa.
Suno kay Mayor Dadivas, ang amo nga tikang nagapakita sang seryoso nga pagtuman sang lokal nga gobyerno sa ila responsibilidad bilang mga public servant sa kampanya kontra iligal nga droga. Dugang pa niya, kinahanglan nga mangin ehemplo anay ang mga nagaserbisyo sa gobyerno antes sila makapangayo sang pagsunod halin sa publiko.
Kalakip sang paglunsar sang ordinansa ang pagpatigayon sang drug testing sa tanan nga opisyal kag empleyado sang Roxas City Government.
Magluwas sa mga empleyado sang City Hall, nagpakita man sang suporta sa ordinansa ang mga miyembro sang City Anti-Drug Abuse Council (CADAC), Bureau of Jail Management and Penology (BJMP), Bureau of Fire Protection (BFP) kag Philippine Drug Enforcement Agency (PDEA).
