Padayon ang preparasyon sang Roxas City Government para sa pagtukod sang bag-o nga drainage system sa Barangay Tiza bilang kabahin sang tikang sa pagsolbar sang madugay na nga problema sa pagbaha sa lugar.
Sa interview sang Bombo Radyo Roxas kay Engr. Abel De Pedro, City Engineer sang Roxas City, iya ginpahayag nga on-going na ang pag-precast sang mga concrete box culvert nga gamiton sa drainage project.
Suno kay De Pedro, mas daku, mas lapad kag mas mabakud ang bag-o nga drainage system nga ginadisenyo agud mas episyente nga makapagwa sang tubig ilabi na kon nagabaskog ang ulan.
Pahayag pa niya, ang proyekto may kalabaon nga 400 lineal meters, halin sa Tiza Bridge pakadto sa junction sang Catmon kag Datiles Street.
Nagapanawagan man ang natungdan sang kooperasyon kag paghangup sang publiko sa posible nga temporaryo nga traffic kag iban pa nga perwisyo samtang ginapatigayon ang konstruksyon.
