Plano sang Roxas City Government ang pagpatukod sang Balay Silangan Reformation Center agud buligan ang mga persona nga na-apektuhan sang ilegal nga droga nga makabalik sa normal kag produktibo nga pangabuhi.
Ini kasunod sang ginpatigayon nga Youth Symposium on Drug Awareness sang City Anti-Drug Abuse Council (CADAC) kag Barkada Kontra Droga (BKD) Organization sang Capiz National High School bilang kabahin sang padayon nga kampanya kuntra illegal droga.
Sa interview sang Bombo Radyo kay Roxas City Mayor Ronnie Dadivas, iya ginpahayag nga importante ang padayon nga pag-edukar sa mga kabataan kag pagbinuligay sang tanan nga mga opisyal agud mapunggan ang paglapta sang ilegal nga droga kag malab-ot ang target nga Drug-Free Roxas City.
Suno pa sa alkalde, kabahin man sang programa ang paghatag sang livelihood assistance sa mga nagbag-o nga kag biktima sang ilegal nga droga agud may yara sila sang bag-ong oportunidad sa kabuhi.
Samtang lakip sa mga lugar sa Capiz nga wala pa sang Balay Silangan Reformation Center, amo ang banwa sang Dumalag kag Panay.
