ROXAS CITY – Preparado na ang gobyerno sang siyudad para sa Sinadya 2019 humalin Disyembre 3-9, 2019 nga may tema ‘Paghambalanay Padulong sa Paghili-usa’.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo.
Suno kay Dadivas nga kapin sa 3 milyones pesos ang ginpain nga pondo sang gobyerno sang siyudad para sa amo nga selebrasyon.
Balantayan sa Disyembre 4 ang Tambihanay; Sinadya Mass Wedding kag Dungog sang Barangay ukon LGU Night.
Sa Disyembre 5 may yara sang opening mass sa Immaculate Concepcion Metropolitan Cathedral nga pagasundan sang opening program kag opisyal nga pagbukas sang Balay Capiznon kun sa diin makit-an ang mga Capiz’ products and crafts fair, may yara man sang Tambol-Sonata; Drum and Lyre Exhibition kag opisyal nga pagbukas sang Sinadya Primero sa Planta Sinadya Food Festival.
Balantayan man ang Estilo Capiz Trade Expo sa Robinsons Place Roxas.
Ginalauman man nga pagadugukan sang madamo nga mga tumalan-aw ang Handog ng Bombo Radyo at Star FM sa Sinadya; Dance Showdown sa Dinggoy Roxas Civic Center sa Disyembre 5, alas 5 sa hapon kag opisyal nga pagbukas sang Sinadya Food Festival sa Roxas City Plaza.
Sa Disyembre 6, balantayan naman ang Flavors of Western Visayas Year 2 ‘The Hidden Treasures of Roxas City’, Tabu-an Cooking Competition, Savores de Visayas Ciudad, Sadsad sa Sinadya, Kapawa: Lighting of the Heritage Zone Interactive Landmark Light Display, Presentasyon sang Musa dela Immaculada Concepcion, Kasilaw sa Sinadya: Pyrotechnic Display, Litrato: Heritage Zone Photo Competition kag Sinadya Whiteout Party.
Balantayan man sa Disyembre 7 ang 1st Sinadya National Dog Show and Pet Blessing, Ang Panublion Museum Think Tank Talk, Opening sang Exhibit-Ilig, Celebrity Zumba sa Sinadya, Artista sa Sinadya kag Kasilaw sa Sinadya: Pyrotechnic Display.
Sa Disyembre 8, bantayan naman ang Red Cross Million Volunteer Run 5, Prosisyon sang mga Patron, Misa Bisperas sa Plaza, Prusisyon sa Suba, Koronasyon sang Reyna sang Dakbanwa Birhen Dela Immaculada, Kasilaw sa Sinadya; Pyrotechnic Display, kag Marcha dela Immaculada Concepcion.
Samtang sa Disyembre 9 naman patigayunon ang Misa sa Pista sa Immaculate Concepcion Metropolitan Cathedral, Misa Pontifical kag Halad sang Musa sa Immaculada Concepcion, kag Amba Maria Choral Tableau Competition.
