ROXAS CITY – All-set na ang gobyerno sang siyudad para sa nanari-sari nga mga aktibidad nga patigayunon kadungan sang selebrasyon sang Sinadya 2019.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo.
Suno kay Dadivas nga sa bulig sang magkatuhay nga mga ahensiya sang gobyerno, nangin mahapon ang pagdihon kag pagplano sang nanari-sari nga aktibidad para sa amo nga kahiwatan.
Suno sa alkalde nga ila nadesisyunan nga patigayunon ang fireworks display sa tatlo ka magkasunod nga gab-i humalin Disyembre 6 tubtob 8 agud mangin maduagon ang kada gab-i sang selebrasyon.
Ginpahayag ni Dadivas nga nahangpan niya nga gina-‘look forward’ ukon ginabantayan gid sang tanan ang nasambit nga selebrasyon gani ini ang nagserbi niya nga motibasyon agud buhion ang kasadya sang Sinadya Festival.
Isa man ini ka pamaagi suno kay Dadivas agud mapasanyog ang turismo sang siyudad sang Roxas kag mapakilala sa iban nga lugar.
Ginpabugal man ni Dadivas ang priority project sang gobyerno sang siyudad nga Redevelopment sang City Plaza kag Heritage Zone Lighting Project nga gintinguhaan gid nga matapos antes ang selebrasyon.
Dako naman ang pagsalig sang alkalde sa masobra 500 ka mga katapo sang Philippine National Police, Philippine Coast Guard, Philippine Drug Enforcement Agency (PDEA), Traffic Management Unit, Roxas City Emergency Response Team (RCERT) kag iban pa nga law enforcement unit sa pagpasiguro sang kalinong kag katawhay kadungan sang nasambit nga selebrasyon.
Ang Sinadya 2019 ang natalana sa humalin Disyembre 3-9, 2019.
