ROXAS CITY – Nakahanda ang gobyerno sang siyudad sang Roxas sa pag-alabutan sang mga indibidwal ilabi pa kun pananglitan dulaon na ang modified general community quarantine (MGCQ) matapos ang Hunyo 15 kag dalayon nga buksan ang pahugpaan kag pantalan sa siyudad.
Ini ang ginpahayag ni City Mayor Ronnie Dadivas sang mainterview sang Bombo Radyo.
Suno kay Dadivas nga agud maamligan sa gihapon ang ikaayong-lawas sang publiko, magapahamtang sang non-contact thermal scan sa Roxas City airport kag sa Culasi port nga amo ang gamiton para sa temperature checking sang magaabot nga mga indibidwal.
May yara man sang iga-designar nga mga holding areas para sa mga non-returning residents nga may mga business, work ukon service-related nga transaksiyon sa siyudad.
Ginpasalig man sang alkalde ang bastante nga personal protective equipments (PPE’s) para sa mga frontliners nga maga-duty sa pahugpaan kag pantalan.
Apang ginklaro sang alkalde nga nagahulat pa sila sa mangin rekomendasyon sang national Inter-Agency Task Force (IATF) natuhoy sa dalayon nga pagpanumbalik sang commercial flights kag passenger vessels nga magaabot sa Roxas City.
Samtang, ginpasiguro sang alkalde nga may handa nga mag-akomodar ang gobyerno sang siyudad sang dugang nga mga returning residents nga kinahanglan ipaidalom sa facility quarantine.
Suno diri nga magluwas sa Hortus Botanicus sa Barangay Milibili, sining siyudad, may anom pa ka mga lodging houses, motels kag inns nga ginabayaran ang gobyerno para magserbi nga quarantine facility.
Ginpasalig sang alkalde nga may bastante pa nga pondo ang gobyerno sang siyudad para sa padayon nga kampanya kontra coronavirus disease (COVID-19).
