Ginpasar sang Roxas City Council ang ordinansa nga nagapaiway sa pagpasaka sang rental rates sa Teodoro Arcenas Trade Center.
Ini bangud sa padayon nga epekto sang energy crisis sa pungsod.
Sa interview sang Bombo Radyo kay Melvin Galagate, head sang Roxas City Communication Group, iya ginpahayag nga dako ini nga bulig para sa mga manugbaligya ang pagpaiway sang pagpasaka sang renta sa mga pwesto sa public market sang syudad tubtob tuig 2027.
Suno kay Galagate, ang katuyuan sang amo nga ordinansa amo ang pagbulig sa mga magagmay nga negosyante nga naga-antos sa epekto sang pagsaka sang presyo sang gatong.
Dugang pa niya, ini ang magabulig sa pagpa-istable sang presyo sang mga nagapanguna nga balaklon kag magapahagan-hagan sang epekto sini sa mga bumalakal ukon customers.
Ginpasiguro man niya nga padayon nga nagahimo sang nagakaigo nga tikang ang City Council para sa ikaayo sang mga pumoluyo kag lokal nga negosyo.
