ROXAS CITY – Nagpatigayon sang isa ka sinapol ang gobyerno sang siyudad kun sa diin ginhinalaan ang mga lihok nga pagahimuon agud matapna kag mapunggan nga makasulod sa siyudad sang Roxas ang coronavirus disease (COVID-19).
Ang nasambit nga sinapol ang gintambungan sang magkatuhay nga mga ahensiya sang gobyerno, health officials, mga public and private sectors, religious groups kag iban pa.
Suno kay City Mayor Ronnie Dadivas, ini ang kasunod sang pagdeklarar na ni Presidente Rodrigo Duterte sang state of public health emergency sa pungsod bangud sa outbreak sang nasambit nga balatian.
Katuyuan sini suno sa alkalde nga makapreparar pananglitan makasulod ang nasambit nga virus sa siyudad.
Kinahanglan man suno diri nga may pat-od nga plano kun ano ang pagahimuon sa tion nga may mapagkit nga kompirmado nga kaso sang COVID-19 sa siyudad.
Gintalakay man diri ang pila ka mga precautionary measures agud malikawan nga malatnan sang nasambit nga balatian.
Sa nasambit nga sinapol ginpahayag man sang alkalde nga nakahanda ang lokal nga gobyerno sang siyudad sa pagbulig sa health sector sa mga lihok agud malikawan nga makasulod ang amo nga balatian sa siyudad.
Ginpahayag sini nga pananaglitan nga may indibidwal man nga magpositibo sa amo nga balatian sa siyudad, handa ang gobyerno sang siyudad nga abagahon ang kagastuhanan sa pagpabulong diri.
Suno naman kay City Councilor Cesar Yap Jr., dako ang papel sang mga Barangay Health Workers (BHW’s) sa nasambit nga kampanya bangud sila ang pinakamalapit sa komunidad.
Nagaapelar naman si Provincial Health Officer Leah Del Rosario sa publiko nga likawan ang diskriminasyon sa mga indibidwal nga nagapaidalom sa quarantine.
Pananglitan may mga persona suno sa iya nga nagpauli sa siyudad kag probinsiya gikan sa mga kapungsuran nga apektado sang COVID-19, importante nga gilayon magreport sa mga local health officials bangud kinahanglan nga ma-validate kun makabig sila nga Persons Under Monitoring (PUM) ukon Persons Under Investigation (PUI).
