ROXAS CITY – Na-planohan sang maayo sang Roxas City Government ang mga tikang sa pagsulod ni bagyo Opong sa syudad sang Roxas rason nga wala sang mayor nga mga insidente nga natabo.
Sa interview sang Bombo Radyo kay Mayor Ronnie Dadivas, iya ginpahayag nga antes pa man nagtupa ang bagyo, may yara na sang serye sang pagsinapol nga ginpatigayon upod ang mga concerned offices sa paghimo sang mga tikang agud mapabilin nga safe ang mga pumuluyo.
Suno sa alkalde, dako ang nangin katungdanan sang mga pumuluyo sa diin ang mga yara sa danger zone, ang gilayon nga nag-evacuate isa ka adlaw antes nagtupa ang bagyo Opong.
Maayo ini nga indikasyon pahayag ni Mayor Dadivas sa pagpanghanda sang mga pumuluyo sa tion sang kalamidad sa diin wala na sang may natabo nga pwersahanay sa pag-evacuate.
Ginapasalamatan man sang alkalde ang mga barangay officials nga una nga nagresponde sa ila mga nasakupan.
