ROXAS CITY – Nagdugok ang madamo nga mga residente sa City Health Office agud makakuha sang health certificate ukon medical clearance nga ila gamiton sa mga border security checkpoint sa mga land entries sa siyudad sang Roxas.
Sa obserbasyon sang Bombo Radyo News Team, nagalab-ot sa halos 200 tubtob 300 ka mga tawo ang nagdagsa agud magkuha sang amo nga dokumento.
Talalupangdon man ang wala pag-obserbar sang mga ini sa social distancing policy sang Department of Health (DOH) bangud sa pamahog sang coronavirus disease (COVID-19).
Suno kay Manong Toto, isa ka collector, wala sini mauyunan ang kasubong pabag-o bag-o sang mga pagsulundan sa ila pagkuha sang amo nga dokumento.
Ginpahayag sini nga tuman ka hinay ang paghulag sang ila pila.
Suno pa sa iya nga kalakip sa ginapangayo sa ila agud makakuha sang health certification amo ang valid ID kun sa diin nakasaad nga residente sila sang siyudad sang Roxas.
