ROXAS CITY – Bugal sang Roxas City Jail ang pagkilala bilang National City Jail Warden of the Year 2020 kay Chief Inspector Abner Zamora.
Sa exclusive interview sang Bombo Radyo kay Jailwarden Zamora, ginpahayag sini nga nangin balasehan sang nabaton nga pasidungog ang maayo nga performance humalin nga nagpungko ini bilang jailwarden sang Bureau of Jail Management and Penology (BJMP) sa syudad.
Suno sa opisyal nga nag-agi sa maidid nga screening sang screening committee ang nasambit nga kompetisyon nga ginpasakupan man sang iban nga mga jailwardens sa magkatuhay nga rehiyon sa Pilipinas.
Aminado si Zamora nga wala ini naglaum nga makabaton sang pasidungog bangud tagsa ka mga jailwarden ang nagpresentar sang ila mga accomplishments, unique programs nga nagapakita sang ila maayo nga performance sa pagdumala sa isa ka jail facility.
Apang nagapati ini nga daku ang nabulig sang ginapatuman sini nga mga unique kag sustainable programs kag livelihood sa mga Persons Deprived of Liberty (PDL’s).
Magluwas diri madamo nga mga PDLs ang naka-graduate pinaagi sa ila nga partnership sa TESDA sa diin ila ini maggamit sa pagguha sa facilidad labi na sa pagpangita sang trabaho.
Malipayon man nga gintuad ni Zamora ang positibo nga feedback nga nabaton sa gina-implementar nga mga program nga daku ang nabulig indi lamang sa mga PDL’s kundi kalakip man sa ila pamilya kag komunidad.
Samtang gin-athag sang opisyal ang pagdumili sa pagbisita sa mga PDL’s bangud sa peligro nga dala sang COVID-19.
Apang agud indi ma-bored ang mga PDL’s may ginapatigayon nga mga programa kag aktibidad kada adlaw.
Gina-edukar man ang mga PDL’s angut sa COVID-19 kag ang epekto sini sa ikaayong lawas sang isa ka indibidwal.
Bilang pag-amlig man sa ikaayong lawas sang mga PDL’s may isa ka nurse nga naga-duty sa facilidad nga naga-tsekyar sa ila.
Nahibaluan nga ini na ang ikaduha nga national award nga nabaton ni Zamora.
