ROXAS CITY – Ginpatpat ni Roxas City Mayor Ronnie Dadivas ang mga nahimuan sang iya administrasyon sa una nga 100 ka adlaw sini sa posisyon bilang alkalde sa iya nga labing una nga State of the City Address.
Suno sa alkalde nga dako ang iya nga pagpasalamat sa kooperasyon sang mga departamento sang gobyerno sang siyudad, magkatuhay nga mga ahensiya kag mga pumuluyo agud mahatagan sang katumanan ang iya nga mga development agenda nga amo ang CHANCES ukon Clean-up and Beautification Program, Health and Wellness, Agriculture & Aquaculture Support, Negosyo, Community & Infrastructure Development, Education and Environment kag Social Services.
Pila sa mga kadalag-an sang iya administrasyon nga gintuad sang alkalde amo ang pagpatuman sang road clearing operations sa Teodoro Arcenas Trade Center, Burgos Talipapa kag iban pa nga mga karsadahon sa siyudad.
Gindayaw man man sini ang hugot nga kooperasyon sang Roxas Environmental Sanitation Enforcement Team (RESET).
Dako man suno sa alkalde ang nabulig sang gintukod nga Anti-Dengue Crisis Committee agud tapnaon ang pagduging sang balatian nga dengue sa siyudad kag ang Suicide Crisis Committee kun sa diin madamo sang kabuhi nga nasalbar.
Ginpabugal man ni Dadivas ang paghatag sang solusyon sa problema sa mga drainage sa siyudad kag mga illegal structure sa panghigaron sang Panay River.
Ginpasalig man sang alkalde nga sa tuig 2020, padayunon sini ang pagpatigayon sang service-caravan sa mga kabaranggayan kun sa diin ginatanyagan sang medikal nga bulig ang mga pumuluyo.
Tinguhaon man sini sa masunod nga tuig 2020 nga makadihon sang scholarship program para sa mga estudyante sa siyudad, makapatukod sang 20-bed capacity maternity clinic kag magpatuman sang Busog-Lusog feeding program para sa mga kabataan.
Ginpasalig man sang alkalde ang padayon nga paghatag sang financial, funeral kag medical assistance subong man ang tayuyon nga pasweldo sa mga empleyado sang gobyerno sang siyudad.
