ROXAS CITY, CAPIZ- Ginpagwa ni Roxas City Mayor Ronnie Dadivas ang Executive Order (EO) No. 13 bilang pagsunod sa direktiba sang Presidente kag sang bag-o nga Secretary sang Department of Public Works and Highways (DPWH).
Ini nga mando ang nagatuyo nga masiguro ang transparency kag koordinasyon sa mga proyekto sang DPWH sa syudad.
Sa interview sang Bombo Radyo kay Dadivas, iya ginpahayag nga may mga proyekto nga ginapatigayon sang DPWH nga wala sang koordinasyon sa lokal nga gobyerno.
Paagi sa EO 13, ginamanduan nga antes umpisahan ang bisan ano nga proyekto, kinahanglan anay nga makig-angot ang DPWH sa lokal nga gobyerno sang Roxas City.
Santo sa Local Government Code, kinahanglan nga ang tanan nga national government agencies magpakonsulta sa lokal nga gobyerno antes mag-implementar sang proyekto.
Ginpabakod pa gid ini sang department order ni DPWH Secretary Vince Dizon.
Sa idalum sang EO 13, kinahanglan konsultahon ang lokal nga gobyerno parte sa budget kag transaction sang proyekto, kag magpadala sang notice kung may ara sang obrahon ukon kay-uhon nga dalan.
Ini ang makabulig malikawan ang duplikasyon kag masiguro ang kalidad kag insakto nga implementasyon.
Suno pa sa iya, kaupod man sang lokal nga gobyerno ang City Engineering Office sa implementasyon sang Executive Order kag sa pag tsekyar sang kopya sang plano kag programa sang mga proyekto.
Sa katapusan,mensahe ni Mayor Dadivas sa publiko nga magpabilin nga aligmat kag i-report kung may indi insakto nga implementasyon sang proyekto, mapa-opisyal man ukon ordinaryo nga indibidwal.
VIA BOMBO SAIRA JOY ALU-AD BAUTISTA
