ROXAS CITY – Gina-usisa sa karon sang Roxas City Police Station ang isa ka lalaki nga nagdepensa nga nagsala lamang siya sang kuha sang naka-park nga motorsiklo kag nagpanindugan nga wala ini nagpang-motornap sa Barangay Loctugan, Roxas City.
Mahibaluan nga temporaryo nga gin-kustodiya sang pulisya si Ryan Opera, residente sang Barangay Adlawan matapos nga nasal-an sini ang isa ka motorsiklo nga amo ang iya ginhulam nga motorsiklo sa iya tiyo.
Sa nakuha nga impormasyon sang Bombo Radyo, ginaalegar nga gintapungol pa ni Rodolfo Bengaura Jr. sang Barangay Loctugan si Opera matapos nakit-an niya ini nga ginasakyan ang iya motorsiklo.
Apang nagdepensa si Opera nga nagsala lamang siya bangud pareho sang model kag duag ang motorsiklo ni Bengaura kag ang ginhulam sini nga motorsiklo nga Suzuki Smash nga nagaduag itom.
Sa ulihi, nakit-an man sa amo nga lugar ang motorsiklo ni Opera kag napamatud-an nga pareho gidman sang dagway ang duha ka mga motorsiklo.
