ROXAS CITY – Ilabi pa nga ginpasangkad sang Roxas City Police Station ang ila nga kampanya kontra ilegal nga droga.
Ini ang ginpahayag sang tagpamaba sang Roxas City PNP nga si Police Master Sergeant Ramil Arcangeles sang mainterview sang Bombo Radyo.
Suno kay Arcangeles, ila nga ginapasangkad ang amo nga kampanya pinaagi sa hugot nga koordinasyon sa Barangay Anti-Drugs Abuse Council (BADAC) sang magkatuhay nga mga kabaranggayan sa siyudad sang Roxas.
Ba-se sa ila monitoring suno kay Arcangeles, may pila ka mga drug surrenderers nga una na nga nag-surrender pinaagi sa Oplan-Tokhang nga liwat naman nga nagbalik sa ila ilegal nga buluhaton.
Nagalab-ot suno sa iya sa 1, 500 ka mga indibidwal ang mga drug surrenderers nga nagpaidalom na sa Community-based Drug Rehabilitation Program (CDRP) apang may pipila sa mga ini ang liwat naman naggamit kag nagduso sang ilegal nga droga.
Ginpahayag pa sini nga sa masobra 200 ka mga drug suspek nga nagkaladakpan sa ila operasyon kag naaresto nga napahilway pinaagi sa plea bargaining agreement, may yara man sang nagbalik sa ila ilegal nga aktibidad.
Magluwas pa diri may na-monitor man ang pulisya nga mga newly-identified drug personalities sa siyudad.
Bangud diri ilabi pa nga ginpasangkad sang pulisya ang ila nga kampanya agud dalayon na nga mahilway sa ilegal nga droga ang siyudad sang Roxas.
