ROXAS CITY – Magapatigayon sang maid-id nga imbestigasyon ang mga katapo sang Roxas Component City Police Station (RCCPS) angut sa gin-abandonar nga bag-o bun-ag nga lapsag kaina sang aga, sa Sitio Calumdom, Barangay Tiza, Roxas City.
Sa interview sang Bombo Radyo kay Police Senior Master Sergeant Ramil Arcangeles, Information Officer sang Roxas City PNP, ginsiling sini nga prayoridad nila sa karon ang sitwasyon sang lapsag matapos nga mautod ang natuo nga hita kag nabali ang nawala nga tuhod sini bangud sa pagtaban sang ido.
Makabig suno diri ang isa ka milagro ang natabo bangud nagabato pa ang bata nga mabuhi apisar daku ang naangkon sini nga pilas, ginpaidalum naman ini sa operasyon kag ginasiguro sang pamunuan sang pribado nga ospital nga pagatutukan ang estado sang bata.
Kaangut sini, ginapromisa ni Arcangeles ang maid-id nga imbestigasyon kag matumod ang pagkakilanlan sang ginikanan nga nag-abandonar sa lapsag.
Igareview man sang mga kapulisan, ang kuha nga CCTV footage sa isa ka balay bangud posible nga nakuha sang camera ang may kahimuan, kag magakuha sang listahan sang mga nagabusong sa nasambit nga barangay.
Ginasiguro ni Arcangeles nga maga-agi sa husto nga proseso ang imbestigasyon kag mahibaluan ang rason sang iloy kun ngaman nahimo sini nga abandonahon ang iya bata.
Panugyan pa sang opisyal sa mga ginikanan, nga hibaluon gid ang ginapadulongan kag ginahimo sang ila mga kabataan agud malikawan ang mga butang nga pagahinulsulan nila sa ulihe.
