ROXAS CITY – May ginauyatan na nga plate-number ang mga kapulisan sa ginaalegar get-away vehicle nga ginsakyan sang wala makilala nga mga suspek nga yara sa likod sang pagluthang-patay kay Barangay Kagawad Onel ‘Dodoy’ Arandez sang Barangay Punta Tabuc sa isa ka talyer sa Barangay Cagay, Roxas City.
Ini ang ginpahayag ni Police Master Sergeant Ramil Arcangeles, ang tagpamaba sang Roxas City Police Station sang mainterview sang Bombo Radyo.
Suno kay Arcangeles, indi pa nila mahimo nga mabuyagyag sa publiko ang plate number sang Toyota Innova nga nagaduag pula bangud padayon pa ang ila beripikasyon sa pamunuan sang Land Transportation Office (LTO) agud matumod kun kay sin-o nakarehistro ang salakyan.
Samtang siguruhon man sang mga kapulisan nga makakuha sang kopya sang mga CCTV footages nga makabulig sa pagtumod sang salakyan sang mga suspetsado.
Makabulig man ini suno kay Arcangeles agud makilala ang mga suspek nga yara sa likod sang nasambit nga krimen.
