ROXAS CITY – Naghimo na sang tikang ang pamunuan sang Roxas City PNP agud matapna ang nagaduging nga drag racing sang mga menor de edad sa Barangay Banica kag Bato, Roxas City.
Ginpahayag ni Police Master Sergeant Ramil Arcangeles nga nagpakig-angut na sila kanday Punong Barangay Victor Dolor sang Banica kag Kapitan Antonio Besana sang Barangay Bato, agud ma-monitor ang lugar sa diin nagaduging ang iligal nga drag racing.
Suno kay Arcangeles nga pinaagi sang ila nga koordinasyon sa mga opisyales sa barangay, nagalaum sila nga gilayon nga impormahon ang mga pulis pananglitan nga may ma-monitor nga nagapatigayon sini nga iligal nga aktibidad agud sila ang madakpan.
Nahibaluan nga mismo ang ginikanan sang mga menor de edad nga nagapatigayon sang pagkarera sang motorsiklo ang nagpangayo sang bulig sa mga kapulisan,agud matapna ini nga buluhaton bangud yara sa peligro ang kabuhi sang ila mga kabataan.
Ginakabig ni Arcangeles nga pagrescue sa mga kabataan ang ila ginhimo nga operasyon sa diin apat ka mga solterito ang ila nadakpan kag ginturn over sa mga ginikanan samtang gintugyan sang mga pulis ang mga motorsiklo sa Traffic Management Group para sa nagakaigo nga disposisyon.
