ROXAS CITY – Ginkompirmar sang tagpamaba sang Roxas City Police Station nga may yara na sang persons of interest ang mga pulis sa nagluntad nga shooting incidents sa Sitio Switch, Barangay Adlawan, Roxas City sadtong Disyembre 6, 2020.
Ginkilala ang napatay nga biktima nga si Regie Gacol sang nasambit nga lugar.
Sa interview sang Bombo Radyo kay Police Master Sergeant Ramil Arcangeles nga naka-secured na sila sang mga CCTV footages sa lugar antes natabo ang insidente.
Ginpahayag pa sini nga planado ang pagluthang patay sa biktima bangud nakita sa nasambit nga CCTV footages ang mga suspek nga nakasakay sa motorsiklo kag makapila ka-beses na nga nagabalik-balik sa lugar.
Matandaan nga naguwa ang biktima sa ila puloy-an agud kuntani nga magbakal sang softdrinks sa tindahan sang hinali na lamang ini nga ginluthang patay sang wala matumod nga mga suspek.
Nabatian man mismo sang mga himata sini ang paglupok sang armas luthang rason nga nagguha ang iya anak kag nakita nga duguon na ang iya amay.
Matapos ang pagluthang-patay sa biktima gilayon man nga nagpalagyo ang mga suspek sakay sa isa ka TMX nga motorsiklo.
Narekober sa lugar ang isa ka basiyo sang ginapatihan .45 calibre sang armas luthang.
Nag-angkom naman sang duha ka igo sa dughan, isa sa guya kag isa sa butkon ang biktima.
Padayon sa gihapon ang imbestigasyon sang mga kapulisan sa posible pagkakilan-an sang suspek kag motibo sini sa pagpangluthang sa biktima.
