ROXAS CITY – Padayon nga ginahulat sang mga imbestigador sang Roxas City PNP ang resulta sang autopsy nga ginpatigayon sang Regional Crime Laboratory sa bangkay ni Maria Luz Peñaroyo, 33-anyos nga nasapwan nga yara na sa advanced state of decomposition sa isa ka balay sa Sitio Patyo, Barangay Bago, Roxas City.
Ginpahayag ni Police Master Sergeant Ramil Arcangeles, tagpamaba sang Roxas City PNP nga daku ang mangin papel sa ginpatigayon nga autopsy agud mAdeterminar ang gintunaan sang kamatayon ni Peñaroyo.
Suno kay Arcangeles, may yara na sang pangalan sang ginakabig persons of interest ang imbestigador sa kaso sa diin ginatutukan ini sang mga otoridad kag pagakuhaan sang statement.
Magluwas diri, padayon man ang pagpangita sang impormasyon kag testimoniya sang mga residente sa lugar nga makabulig sa imbestigasyon sang pulisya.
Ginatutukan man sang kapulisan ang posible katapusan nga mga indibidwal nga nakaupod ni Peñaroyo antes nasapwan ang iya nga bangkay.
Matandaan sa exclusibo nga interview sang Bombo Radyo kay Police Lt. Col. Dr. Joe Martin Fuentes, sang Regional Crime Laboratory nagguwa sa resulta sang otopsiya nga ginpatay ang biktima kag posible nga ginhimuslan pa ini antes ginpatay sang wala mahibaluan nga suspek.
