ROXAS CITY – Nag-apelar ang mga kapulisan sa syudad sang Roxas nga mahatagan ang proper disposal area ang mga nakumpiskar nga gasolina gikan sa nagkaladakpan nga nagabaligya sang tiningi ukon binotilya nga gasolina sa syudad roxas.
Ginpahayag ni Police Master Sergeant Ramil Arcangeles, Public Information officer sang Roxas City Police Station nga sa nasambit nga estasyon sang pulisya temporaryo nga ginabutang ang mga nakumpiskar nga gasolina, kaha sang softdrinks, kag mga botelya santu sa mandu sang city prosecutors office.
Apang indi safe kag proper disposal area ang police station para butangan sang gasolina.
Suno sa kay Arcangeles posible nga tunaan sang sunog ang presensya sang mga gasolina.
Kadungan sini, ginpanindugan ni Arcangeles nga wala ginakuha sang mga pulis ang gasolina kag ginabutang sa mga personal nga mga salakyan kabaliktaran sa mga ginapasibangud sang iban.
Suno kay Arcangeles indi mahimo nga mabuhinan ang mga gasolina bangud dako ang salabton sang Roxas City PNP sa tion nga pangitaon ini sa korte.
